Локалитетот е на надморска височина од 320 метри
Алпинистичко, спортско качувачки локалитет Плоча се наоѓа во југоисточна Македонија на 23 километри од градот Штип. До него води регионалниот пат Штип-Радовиш, а од главниот град Скопје се стигнува преку автопатот М75 Скопје-Велес и регионалниот пат Велес-Штип.
Локалитетот Плоча е еден од најдобро опремените алпинистичко-спортско качувачки локалитети во Македонија, кој е поделен во неколку сектори и располага со околу 30 алпинистички и 30 спортски насоки со различна тежина и повеке болдери. Повеќето насоки се обезбедени со експанзиони клинови кои што нудат максимална безбедност за почетници, но има и насоки со алпинистички клинови и насоки за традиционално качување. Просечната должина на алпинистичките насоки е околу 100 метри, а на спортските од 8 до 20 метри. Карпите се со североисточна експонираност и по состав се Андезит кој се одликува со голема цврстина и компактност.
Самиот предел околу локалитетот нуди голема можност и за рекреативна посета, планински велосипедизам и туристички прошетки. Местото е прекриено со Дабова шума во која има маркирано неколку патеки со поставени клупи за одмор. Исто така можат да се посетат и археолошките наоѓалишта на Пилав Тепе и врвот Плоча, манастирот Свети Пантелејмон и црквата Свети Атанасиј. Локалитетот нуди сместување во алпинистичкиот дом ’’Плоча“ кој располага со 12 легла и тоалет со туш и може да се користи со претходна најава.
