На 15.03.2025 членовите на Алпинистички клуб Скопје, Стефанија и Радован искачија првенствена насока “Маргарита” на Матка во “Димева карпа” – карпата лево од насоките “К” на истоимениот сектор.
Качивме 110м, оценка VI во 3 должини. (I – 20м оцена 4+; II – 45м оцена 4; III – 55м оцена 6)
Почетокот се наоѓа помеѓу насоките Доверба од лева страна и Димева од десна. Првата должина се движи по еден плочест дел со пукнатини кои нудат можност за поставување опрема, каде оставивме и еден клин. Должината е 20м, оцена 4+ која ни беше повеќе налик 5+ поради големата кршливост на карпата која е покриена на делови со мов. Сидриштето е на дрво после трилер качувањето.
Од дрвото по неколку скокчиња се движи дијагонално в десно (тука воедно и ја сечи првата должина на Димева) до едно големо дрво, па уште еден скок до полицата до друго дрво десно од каде беше подобро за осигурување за следната должина бидејќи не е на пат на камењата кои паѓаа. Должината е 45м, а оцена 4. Оставивме 2 клина in situ, а сретнавме и 1 од Димева.
Третата започнува со пречење в лево кон левиот дел на жлебот, каде има закован клин и од него се продолжува право нагоре до излез на врвот каде направивме сидриште со гуртна околу карпа и клин (подоцна го извадивме). Должината е 55м со оцена VI.
За отстап се спуштивме лево во долот низ обраснат терен до патеката покрај р. Треска. Потребна опрема за качување на насоката сет френдови (ние користевме помали Тотеми и Блек Диамонд до 2ка), сет чокови, чекан, 2-3клинови, 12 комплети.
